Namaste!
Agar aap ek nayi maa hain, to aap meri baat se relate karengi.
Baby ke aane ki khushi sabse badi hoti hai… lekin uske sath-sath meri skin bhi kaafi badal gayi thi.
Dullness, dry patches, pigmentation aur ek ajeeb si thakaan face pe dikhne lagi thi.
Pehle laga yeh sab normal hai – par jab mirror me apna chehra dekha to lagaa, “Mera natural glow kahaan chala gaya?”
Par maine give up nahi kiya. Main expensive products kharidne nahi gayi… maine sirf apne kitchen ke simple nuskhe use kiye – aur dheere-dheere meri skin me fir se jaan aayi.
Aaj ke blog me main wahi hacks aapke saath share kar rahi hoon – jo maine khud use kiye aur jinka result mujhe dikhayi diya.
🤔 Pregnancy ke baad skin dull kyun ho jati hai?
Ek maa ke roop me hum apne aap ko sabse aakhri me rakhte hain –
Na neend poori hoti hai, na khud ka dhyaan.
Upar se hormones ke changes aur stress bhi apna kaam kar jaate hain.
Meri skin pe:
- Cheeks dry lagte the
- Mouth area pe halka pigmentation aa gaya tha
- Overall face lifeless sa lagta tha
Yeh Hai Mere 5 Personal Skin Care Hacks (Ghar Ke Nuskhe)
1. Haldi + Doodh Face Pack – Ghar ka glow booster
Jab kuch samajh na aaye, to haldi ka sahara lo!
Main kaise banati hoon:
- 1 chammach kachha doodh + 1 chhoti chimmach haldi
- Mix karke face pe 10 minute lagao
- Fir thande paani se dho lo
Main yeh week me 2 baar karti hoon.
Result: Skin tone halka sa clear feel hone laga, aur ek soft glow bhi dikhne laga.
2. Nariyal Tel Se Night Massage – Dryness ka the end
Mujhe raat ko sote waqt halka sa coconut oil lagakar face pe circular motion me massage karna acha lagta hai.
- Skin soft hoti hai
- Blood circulation improve hota hai
- Aur sabse badi baat – yeh baby-safe bhi hai!
3. Aloe Vera Gel – Nature ka magic
Market wale gel nahi – main apne ghar ke aloe vera plant ka fresh gel nikaal ke lagati hoon.
- 15 min tak face pe rehne deti hoon
- Fir halka sa moisturiser laga leti hoon
Yeh meri skin ko calm karta hai aur thoda thoda pigmentation bhi kam kar raha hai.
4. Nimbu + Shehad – Pigmentation spot treatment
Mouth ke aas paas dark patches ho gaye the.
To main yeh nuskha try karti hoon:
- 1 chammach nimbu ras + 1 chammach shehad
- Sirf dark area pe lagao
- 5–7 minute baad dho lo
Caution: Sirf week me 1–2 baar hi karo. Agar jala jala sa lage to turant hata lo.
5. Paani Piyo – Sabse simple hack
Main apni hydration bhool chuki thi.
Lekin jab se maine subah nimbu paani start kiya aur din bhar paani peene ka dhyan rakha – meri skin automatically thodi fresh lagne lagi.
Mera Real Experience
Mujhe lagta hai har nayi maa ko apni skin me thoda badlav feel hota hai – par agar hum thoda thoda karke apne liye time nikaalein, to changes possible hain.
Mere liye kya kaam kiya:
- Har din 15–20 min self care
- Sirf ghar ke nuskhe – koi mehenga cream nahi
- Aur patience! Result ek hafte me nahi, par 3–4 week me dikhne laga
Aap Bhi Try Karke Dekhiye!
Agar aap bhi post-pregnancy dull skin se guzar rahi ho, to yeh hacks ek baar try karke dekhiye. Shayad aapko bhi wahi confidence wapas mil jaye jo mujhe mila.
💡 Tip: Sabse pehle apna patch test zaroor karein – kyunki har kisi ki skin alag hoti hai.
Disclaimer:
Is blog me diye gaye nuskhe aur tips sirf meri personal experience par adharit hain. Har kisi ki skin aur body alag hoti hai, isliye koi bhi remedy apnaane se pehle patch test karein ya apne doctor ya skin specialist se salah lein. Yeh blog kisi bhi medical advice ka substitute nahi hai.
